တနေ့တလံ

 တောင်တက်ဖူးကြလားခင်ဗျာ။

ကျွန်တော်တို့ တောင်အမြင့်ကြီးတွေကို တက်ကြတဲ့အခါ အစပိုင်းတော့ တက်တက်ကြွကြွ ပျော်ပျော်ပါးပါးတက်ကြတယ်ပေါ့နော်

တဖြည်းဖြည်း ညောင်းလာ မောလာတဲ့အခါ ဟာ မရောက်သေးဘူးလားကွာ ဟာတော်ပြီ ဆက်မတက်နိုင်တော့ဘူးဆိုပြီး အကြိမ်ပေါင်းများစွာ တွေးမိတတ်ကြပါတယ်။

ဒါပေမယ့်လည်း တက်လာတဲ့ဟာကို နှမြောပြီး တက်ကြတယ်ပေါ့နော်။

ဒိတောင်ရဲ့ ဒီနေရာကိုရောက်လာတာဟာ အောက်က ဒီလောက်တက်လာခဲ့လို့ပဲ ဆိုတာ သတိရပြီး ဆက်တက်ကြပါတယ်။ အဲ့လိုနဲ့ မောလိုက် နားလိုက် မတက်ချင်တော့ဘူးတွေးလိုက်နဲ့ တက်ရင်းတက်ရင်း အချိန်တန်တော့ တောင်ထိပ်ကိုရောက်ပါတယ်။

လိုချင်တဲ့ပန်းတိုင်ကိုရောက်သွားတဲ့အခါ ရတဲ့ စိတ်ခံစားမှု ၊ တောင်ထိပ်ကနေ မြင်ရတဲ့ လှပတဲ့ရှုခင်းတွေ ကိုကြည့်ရတဲ့စိတ်ခံစားမှု တွေဟာ ပင်ပန်းတာတွေကို ပျောက်သွားလောက်အောင်ကို တန်တဲ့ ရလာဒ်တွေရပါတယ်။ တောင်ပေါ်ကနေပြန်ဆင်းတော့ ပေါ့ပေါ့ပါးပါးလေးဖြစ်သွားရောပေါ့ခင်ဗျာ။

ဒီလိုပါပဲ ကျွန်တော်တို့ဟာ တက်လာတာ အတော်လေးခရီးရောက်နေပါပြီ။

ဒီအချိန်မှာ မောပန်းမယ် ပင်ပန်းမယ် ဒါပေမယ့် ပန်းတိုင်ကိုမြင်နေရတာမို့ အားကိုတင်းပြီး ဆက်လျှောက်ရပါမယ်ခင်ဗျာ။

တောင်တက်ရင် လမ်းတဝက်မှာ မလိုက်ချင်တော့ဘူးလို့နေခဲ့တဲ့သူကတော့ တောင်ထိပ်ကအလှအပတွေကိုမြင်ရမှာမဟုတ်ပေမယ့်

တော်လှန်ရေးအောင်မြင်တဲ့အခါမှာတော့ နေသာသလိုနေခဲ့ကြသူတွေပါ အောင်မြင်မှုအကျိုးရလာဒ်ကို ခံစား၇မှာဖြစ်ပါတယ်။

ကျွန်တော်တို့ဟာ ခြေလှမ်းမှန်မှန်လေး ချီတက်နေဆဲပါ။

ဘာတွေဘယ်လောက်ဖြစ်နေတယ်ဆိုတာကို တော်တော်လေးထဲထဲဝင်ဝင်သိထားတဲ့ ကျွန်တော့်အတွက်တော့ တော်လှန်ရေးဟာ နေ့ရက်တိုင်း အားတက်စရာပါ။

ဝုန်းခနဲ ရလာဒ်တစ်ခု ရလာဖို့အတွက် တထစ်ချင်းစီ တက်နေတဲ့ခရီးမို့

တောင်ထိပ်ထိရောက်အောင်တော့ အတူတူလိုက်ခဲ့ကြပါခင်ဗျာ။ တစ်ဦးကလဲရင် တစ်ဦးကထူလို့ အခက်အခဲတွေကို အတူတူဖြတ်ကျော်ရင်း အောင်မြင်မှုရတဲ့အခါ ဒါဟာ ငါတို့ထုဆစ်ထားတဲ့ အောင်မြင်မှုပဲ လို့ ဝမ်းသာဂုဏ်ယူကြရအောင်ပါခင်ဗျာ။