The Moon on Horizon Illusion

 မိုးကုတ်စက်ဝိုင်းနား ကပ်ပြီးထွက်တဲ့ လ,ကို အမြင်မှောက်ခြင်းအကြောင်း

New Year Countdown

Days

000

:

Hours

00

:

Minutes

00

:

Seconds

00

(ဖတ်ရှုရန် ကြာချိန် ၄ မိနစ်ခန့်)

 

        ဟုတ်ကဲ့၊ အပေါ်က အသုံးအနှုန်းကို မရင်းနှီးဘူးဆိုရင်တောင် လပြည့်ညလို အချိန်မျိုး မြို့ထဲ သွားရင်းလာရင်း မြင်ရလိုက်တဲ့ လ,ဟာ ပုံမှန်ထက် ကြီးနေတာမျိုးကို ကြုံဖူးကြမယ် ထင်ပါတယ်။ လ,ကြီးကို  ဝင်းထိန်နေပြီး ဧရာမဆိုဒ်ကြီး ဖြစ်နေတာမျိုးပေါ့။ ဒါပေမယ့် အဲ့လိုမိုးကုတ်စက်ဝိုင်းပေါ် မေးတင်နေတဲ့ လ,မျိုးမဟုတ်ဘဲ သာမန်ကောင်းကင်မှာ မြင်ရတဲ့ လ,ကတော့ အစက်အပြောက် သေးသေးလေး ဖြစ်နေတာကိုလည်း  သတိထားမိကြမှာပါ။ ဒါပေမယ့် တကယ်တမ်းကျ လ,က အဲ့သလောက် အစက်အပြောက် သေးသေးလေး မဟုတ်မှန်း ကိုယ့်လူတို့ သိကြပါတယ်။ ဆိုတော့ အဲ့ဒီ  “လ အကြီးကြီး ဖြစ်နေတာကို မြင်ရတယ်” ဆိုတာက စိတ်နဲ့ပဲ ဆိုင်တာပါ။ အဲ့တာကြောင့်လည်း “မိုးကုတ်စက်ဝိုင်းနား ကပ်ပြီးထွက်တဲ့ လ,ကို အမြင်မှောက်ခြင်း” လို့ သတ်မှတ်ထားတာပါ။

    ဒီလိုဖြစ်ရတဲ့ အကြောင်းအရင်းကတော့ ကျွန်တော်တို့ရဲ့ ဦးနှောက်က ကျွန်တော်တို့ မြင်သမျှကို ဘယ်လောက်ဝေးတယ်၊ မဝေးဘူး တစ်ချိန်လုံး လိုက်ညှိနေတာကြောင့်ပါ။ အဲ့လို လိုက်ညှိနေလို့ပဲ “ဟာ ဒါကတော့ကြီးတယ်၊ သေးတယ်” ဆိုတာတွေ ဖြစ်လာတာပါ။ မြင်သာအောင် ပြောရရင်ဗျာ- ကောင်းကင်မှာ ပျံသွားတဲ့ လေယာဉ် ထားပါတော့။ တကယ့်တကယ် ဆိုဒ်အကြီးကြီးက ကောင်းကင်မှာ လှမ်းမြင်ရတဲ့အခါ သေးသေးလေး ဖြစ်နေတာမျိုးပေါ့။ လေယာဉ်ကို လက်နဲ့ ကိုင်ထားတဲ့ ပို့စ်မျိုးတွေတောင် ဓါတ်ပုံရိုက်ကြသေးတာပဲကို..နော? ဆိုတော့ ကျွန်တော်တို့ရဲ့ ဦးနှောက်က ကိုယ့်ရှေ့မှာ ရှိနေတဲ့ အရာကို ဘယ်လောက်ဝေးတယ်ဆိုတဲ့အပေါ် မူတည်ပြီး  အဲ့အရာရဲ့ အရွယ်အစားကို ဆုံးဖြတ်ပစ်ပါတယ်။ အကြမ်းဖျင်း ပြောရမယ်ဆိုရင် ကျွန်တော်တို့ရဲ့ မြင်နိုင်စွမ်းက အဆုံးမရှိပါဘူး။ အဲ့တာကြောင့်လည်း ဟိုးအဝေးကြီးမှာရှိတဲ့ နေ၊ လ,နဲ့ ကြယ်တွေကို လှမ်းမြင်နေရတာပေါ့ဗျာ။

        ဒီ လ အကြီးကြီး မြင်ရတယ်ဆိုတဲ့ ဖြစ်စဉ်က ကိုယ်မြင်နေကျ ကမ္ဘာမှာရှိတဲ့ အရာတွေ (အဆောက်အဦးတွေ၊ တောင်တန်းတွေ၊ သစ်ပင်တွေ) နဲ့ လ,ကို တွဲမြင်လိုက်ရတဲ့အခါမှာ ကြုံရတာပါ။ ခုနက ပြောသွားတဲ့ အဆောက်အဦး ဘာညာတွေက ဘယ်လောက်ထိ ကြီးတယ်ဆိုတာ ကျွန်တော်တို့ ဦးနှောက်က သိထားပါတယ်။ အဲ့လိုအရာတွေနဲ့ လ,ကို တွဲမြင်လိုက်ရတဲ့ အခါကျတော့ ကျွန်တော်တို့ ဦးနှောက်လေးခမြာ “ဟင် အဲ့လက တကယ် ဒီနားရောက်နေတာလား၊ အကြီးကြီးလား၊ သေးတာလား၊ နေစမ်းပါဦး” ဆိုတာမျိုးတွေ ဖြစ်ကုန်ပါတယ်။ အဲ့လိုနဲ့ပဲ “ဟာ... လ,ကြီးမှ အကြီးကြီးပဲ” ဆိုပြီး ဦးနှောက်က ဆုံးဖြတ်မိသွားပါရောခင်ဗျာ။ အပေါ်မှာ ပြောခဲ့မိပါသေးတယ် “လ,ကြီးကို ဝင်းထိန်နေတာပဲ” ဆိုပြီး။ အဲ့လို ဝင်းထိန်၊ ဝါတောက်နေရတဲ့ အကြောင်းကတော့ ကမ္ဘာ့လေထုကြောင့် အရောင်ပြောင်းသွားလို့ပဲ ဖြစ်ပါတယ်။ အဲ့ဒီအကြောင်းကို အကျယ် သိချင်ရင်တော့ ဒီလင့်ခ်ကို “ကောင်းကင်ကြီး ဘာလို့ အပြာရောင် ဖြစ်နေရတာလဲ?” နှိပ်ပြီး သွားဖတ်လို့ရပါတယ်ခင်ဗျာ။ ဒါကိုမှ လေထုညစ်ညမ်းနေတာနဲ့ကြုံရင် ဝါနေတဲ့ အရောင်ကနေ တဖြည်းဖြည်း အနီရောင် ပေါက်သွားတာမျိုးကို ကြုံရမှာပါ။ ဒီတော့ တစ်ယောက်ယောက်ကများ ငါ မနေ့ညက “လ,အကြီးကြီးပဲ မြင်လိုက်တာ” လို့ ပြောလာခဲ့ရင်တော့ မဟုတ်ပါဘူး။ အမြင်မှားခဲ့တာပဲ ဖြစ်ပါတယ်ခင်ဗျာ။

        နောက်ဆုံးတစ်ချက်အနေနဲ့ကတော့ လပြည့်နေ့ မိုးကုတ်စက်ဝိုင်းမှာ ရှိနေမယ့် လ,ကို မြင်တယ်။ ဒါပေမယ့် ကိုယ့်မှာ သူနဲ့တွဲမြင်စရာ တစ်ခုခု မရှိဘူးဆိုရင် အဲ့အမြင်မှောက်တဲ့ အကျိုးသက်ရောက်မှုက တော်တော်လေး လျော့သွားမှာပါ။ ပြောရရင် မရှိသလောက်နီးပါးကို ဖြစ်သွားမှာပါ။ ဥပမာ ပင်လယ် ဒါမှမဟုတ် သမုဒ္ဒရာထဲမှာ သာနေတဲ့ လ,မျိုးပေါ့။ တွဲမြင်စရာ အဆောက်အဦးတွေ၊ အပင်တွေ၊ တောင်တန်းတွေ၊ သင်္ဘောတွေ၊ ဘာဆို ဘာမှမရှိ။ အဲ့လိုဆို အမြင်မှားနိုင်ဖို့ တော်တော်လေးကို နည်းသွားမှာပါ။

        ဒီလို လ အကြီးကြီးလို့ အမြင်မှားတာကို ဖျောက်နိုင်တဲ့ နည်းလေး ရှိပါတယ်။ ရိုးရိုးလေးပါပဲ။ လ,နဲ့ ဆန့်ကျင်ဖက်ကို လှည့်လိုက်ပါ။ ပြီးရင် ခါးကိုင်းလိုက်ပါ။ အဲ့မှာ ကိုယ့်ခြေထောက် ၂ ချောင်း ကြားကနေ လ,ကို ဇောက်ထိုး အနေအထားနဲ့ ကြည့်ကြည့်လိုက်ပါ။ ဟုတ်ပါတယ်၊ မိုးကုတ်စက်ဝိုင်း တဝိုက်မှာ ရှိနေတဲ့ အဆောက်အဦးတွေ၊ အပင်တွေ၊ တောင်တန်းတွေ အကုန် ဇောက်ထိုးအတိုင်း မြင်ကုန်ရမှာပါ။ အဲ့မှာတင် ကျွန်တော်တို့ရဲ့ ဦးနှောက်လေးက “ဟ...ဘယ့်နှယ့်ကြီး ဖြစ်သွားပြန်ပတုန်းဟ၊ ဇောက်ထိုးကြီး၊ ဘယ်လိုကြီးတုန်း၊ အော်… နေဦး ဟိုမယ် လ၊ ဟုတ်တယ်... ဟုတ်တယ် အမှန်ပဲ” လို့ ဖြစ်သွားပြီး လ,ကို နဂိုအရွယ်အစားအတိုင်း ပြန်မြင်သွားပါသတဲ့ ခင်ဗျာ။

        အကျဉ်းချုပ် ပြောရရင်တော့ ပုံမှန်အတိုင်းဆို လ,က မိုးကုတ်စက်ဝိုင်းနား မကပ်ဘဲ ကောင်းကင်အလယ်မှာပဲ ရှိတတ်ပါတယ်။ အဲ့လိုဆို သေးသေးလေးပဲ မြင်ရပါတယ်။ ဒါပေမယ့် မိုးကုတ်စက်ဝိုင်းနား ကပ်သွားရင် ကျွန်တော်တို့ မြင်နေကျ အရာတွေနဲ့ တွဲမြင်မိပြီး သူ့ကို အကြီးကြီးလို့ အမှတ်မှားသွားပါတယ်။ အဲ့တာကို ဖျောက်ဖို့အတွက် ဇောက်ထိုးကြည့်လိုက်တဲ့ အခါမှာတော့ လ,က မိုးကုတ်စက်ဝိုင်းနား မကပ်တော့ဘဲ ကောင်းကင်အလယ်မှာ ရှိသလို ပြန်ဖြစ်သွားပါတယ်။ အဲ့လိုနဲ့ လရဲ့ မူရင်းအရွယ်အစားကို ပြန်မြင်ရနိုင်ပါတယ်ခင်ဗျာ။

 

မှတ်ချက်။    ။ ကင်မရာတွေမှာ ကိုယ်မြင်ရသလို လ,အကြီးကြီး ပေါ်စေချင်ရင်  သက်ဆိုင်ရာ

                        Accessories များ၊ Settings များ ချိန်ဆပြီး ရိုက်ရမှာ ဖြစ်ပါတယ်။

C2D

ကိုးကား ; StarTalk Podcast by Neil deGrasse Tyson