ဆောင်းတွင်းနွေ

နွေဦးထက် ဆောင်းဦးရယ်ပူ

ဖြူ ဒီဇင်ဘာ ၃၊ ၂၀၂၂။ အညာဒေသဟာ ဆောင်းရာသီမှာ အရိုးကွဲမတက် အေးတတ်တဲ့ သဘာဝရှိပါတယ်။ ပူပြင်းမှုအားကောင်းတဲ့ အညာဟာ ဆောင်းရောက်တော့လည်း အအေးရှိန် လျော့မသွားပါ။ ဒီဇင်ဘာလထဲရောက်ပြီဆို အညာဒေသက ရွာတွေမှာ သီးနှံရိတ်သိမ်းကြပြီး တရာသီပြောင်းဆောင်းကို ကြိုလင့်တတ်ကြပါတယ်။ ညအချိန်အခါမှာ ထင်းမီးဖိုနားမှာ မိသားစု စုံလင်စွာမီးလှုံကြရင်း စကားစမြည်ပြောကြတာကလည်း အညာဓလေ့ တစ်ခုပါ။ အညာဒေသထွက် ထန်းမြစ်ကို ထင်းမီးဖိုထဲမှာထည့်ပြီး အအေးဒဏ်ကိုအံတုကြတဲ့ အညာသူ အညာသားများ အိပ်ယာဝင်ချိန်မှာတော့ အညာစောင် နှစ်ထပ် သုံးထပ်ကို လွှမ်းခြုံထားရပါတယ်။ ဆောင်းနှင်းဝေဝေ မနက်ခင်းမှာတော့ အညာဒေသ က ကျေးလက်နေပြည်သူတွေဟာ ရေနွေးကြမ်းကို ထမင်းကြမ်းနဲ့ စားသောက်ပြီး လုပ်ငန်းခွင်ဝင်ဖို့ အသင့်ပြင်ကြရပါပြီ။ ဒီမြင်ကွင်းတွေဟာ အာဏာမသိမ်းခင် ကာလတွေက လွမ်းမောဖွယ် အညာရဲ့ သွင်ပြင်တွေပါ။ အာဏာသိမ်း ၂ နှစ်ပြည့်ကာနီး ကာလမှာတော့ အညာဒေသရဲ့ဆောင်းရာသီဟာ အအေးဓာတ်ပျက်ပြယ်ပြီးဘဝတွေလည်း အေးချမ်းမှုတွေ ပျက်သုဉ်းခဲ့ပါပြီ။ ပြည်သူ့ကာကွယ်ရေးတပ်ဖွဲ့ဝင်အညာသား လူငယ် တွေနဲ့ ဒေသခံ အညာသူ အညာသားတစ်ချို့ဟာတိုင်းပြည်အတွက် အသက်ပေးခဲ့ကြပြီမို့ အိမ်ပြန်လမ်း လည်းမရှိတော့ပါ။ ကျန်ရှိနေသူ မိသားစုဝင်တွေဆိုရင်လည်း အိုးအိမ်မဲ့လို့ စစ်ဘေးရှောင်ရင်း ဖြစ်သလို တဲထိုးနေနေကြရပါတယ်။ လက်နက်ကိုင်တော်လှန်ရေးကို အစောဆုံးစတင်ခဲ့တဲ့ အညာဒေသဟာ စစ်ကောင်စီရဲ့ ထိုးစစ်ဆင်မှုတွေကိုလည်း ဆက်တိုက်ရင်ဆိုင်နေရပါတယ်။ အာဏာမသိမ်းခင် ဒီအချိန်တွေဆိုရင် အလှူပွဲ ၊မင်္ဂလာပွဲတွေ အပြိုင်အဆိုင်ဆိုပေမယ့် အခုအချိန်မှာတော့ စစ်ဘေးရှောင်တွေရဲ့ လှည်းဝင်ရိုးသံတွေသာ စည်ကားနေပါတော့တယ်။ စစ်ကြောင်းထိုးရင် ဖုန်တထောင်းထောင်းထနေတဲ့ လမ်းကြမ်းမှာ ပြေးလွှားနေရတာတွေက အညာရဲ့ ဆောင်းကို အကျည်းတန်စေခဲ့ပါပြီ။ စပါး ပဲ‌ ပြောင်း နဲ့ သီးနှံပေါတဲ့ အညာဒေသရဲ့ စိုက်ပျိုးရေးကွင်းပြင် တချို့ဟာလည်း မီးလောင်ပြင်ဖြစ်ပြီး စိုက်ပျိူးရေးလုပ်ငန်းတွေ မအောင်မြင်နိုင်တော့ပါ။ စိုက်ပျိုးရေးနဲ့ အသက်မွေးဝမ်းကြောင်းပြုကြတဲ့ အညာဒေသတချို့မှာ ဆိုရင် အငတ်ဘေးဆိုက်လုနီးပါးဖြစ်လာပါတယ်။ အေးချမ်းမှုမရှိတဲ့ ဆောင်းရာသီမှာ အဟာရချိုတဲ့မှုတွေလည်း ကြုံနေရလို့ ကျန်းမာရေးတွေလည်းချူချာလာပါတယ်။ ဒီနှစ်ဆောင်းရဲ့ နှင်းစက်တွေဟာ တခြားသူတွေအတွက်အေးမြမှုပေးနိင်ပေမယ့် အညာစစ်ရှောင်တွေနဲ့ ဒေသခံတွေအတွက်တော့ ဆောင်ဦးဟာ နွေဦးထက်ပင်ပူလို့နေခဲ့ပါပြီ။
(ဖော်ပြပါ ဆောင်းပါး သည် အညာဒေသခံ ဖြူ၏ အတွေးအမြင် ဖြစ်ပါသည် )
သံလွင်ခက် - Than Lwin Khet News မှတစ်ဆင့် ကူးယူဖော်ပြခြင်းဖြစ်ပါသည်။
@thanlwinkhetnews
before image @ ဆောင်းတွင်းနွေ - The Zero - MV