တော်လှန်သင်္ကြန် ဆောင်ရွက်ရန်များ

 #တော်လှန်သင်္ကြန်_ဆောင်ရွက်ရန်များ

❏ သင်္ကြန်အကြိုနေ့နဲ့ အကျနေ့ (၁၃၊ ၁၄ ဧပြီ ၂၀၂၂)

#ကျဆုံးအာဇာနည် #အကျဉ်းကျသူရဲကောင်း

#PDF_EROs

#အတာအိုးသပိတ်

အကြို၊ အကျ ဒီနှစ်ရက်မှာ ကျဆုံးအာဇာနည်ပုဂ္ဂိုလ်များ၊ အဓမ္မအဖမ်းခံထားရတဲ့ အကျဉ်းကျ သူရဲကောင်းများ၊ PDF နဲ့ EROs စစ်သည်တော်များကို ဂုဏ်ပြု၊ လေးစား၊ ထောက်ပံ့ ကူညီပံ့ပိုးတဲ့ လှုပ်ရှားမှုကြီးကို တနိုင်ငံလုံး ပြည်သူများက ဆင်နွှဲကြဖို့ ဖြစ်တယ်။

ကိုယ့်မိတ်ဆွေအသိုင်းအဝိုင်းမှာ ကျဆုံး အာဇာနည်တွေနဲ့ အကျဉ်းကျ သူရဲကောင်းတွေ၊ နောက်ပြီး ကျန်ရစ်သူ မိသားစုဝင်တွေ၊ PDF နဲ့ EROs စစ်သည်တော်တွေ ရှိကြမှာပါ။ ဒီနှစ်ရက်မှာ ဒီပုဂ္ဂိုလ်တွေကို မဖြစ်မနေ ကူညီလှူဒါန်းကြမယ်ဗျာ။ ငွေအားအပြင် စိတ်ဓာတ်အား၊ နှုတ်အားဖြင့် အလေးအနက် ဂုဏ်ပြုကြဖို့၊ အားပေးကြဖို့ ဖြစ်ပါတယ်။ ကျဆုံးအာဇာနည်တွေအတွက် ဆုမွန်တောင်းကြမယ်ဗျာ။ ကျန်ရစ်သူ မိသားစုကို အားပေးကူညီကြမယ်ဗျာ။ အကျဉ်းကျရဲဘော်တွေအတွက် "ထောင်ဝင်စာ" အရေး ကူညီကြမယ်ဗျာ။ သူတို့ မိသားစုတွေကို အားပေးကူညီကြမယ်ဗျာ။ တောထဲတောင်ထဲ ရောက်နေရတဲ့ PDF သူရဲကောင်းတွေကို မှတ်မှတ်ရရ ဖုန်းဆက် ဂုဏ်ပြုကြမယ်ဗျာ။ ဒါလေးတွေက စိတ်ထဲမှာ ရှိနေပေမယ့် နှုတ်ကထုတ်ပြော၊ ဂုဏ်ပြုကြဖို့က မေ့နေတတ်ကြတယ်ဗျ။

သန်း (၅၀) ကျော်ရှိတဲ့ ပြည်သူတရပ်လုံးကသာ ဒီနှစ်ရက်အတွင်း လှုပ်ရှားမှုကြီးအသွင်နဲ့ PDF တွေကို ဝိုင်းပြီး လှူကြမယ်၊ ဘွန်းဝယ်ကြမယ်၊ PRF ထောက်ပို့တပ် ဝင်ကြမယ်၊ Click ကြမယ်၊ ထောက်ပို့ လုပ်ကြမယ်ဆိုရင် မနည်းလှတဲ့ အလှူငွေပမာဏထိ ကျနော်တို့တွေ ကူညီနိုင်မှာ ဖြစ်ပါတယ်။

မနှစ်ကလိုပဲ သင်္ကြန်ရိုးရာဓလေ့နဲ့အညီ အိမ်တိုင်းမှာ "အတာအိုးသပိတ်" ကို ဆက်လက်ဆင်နွှဲကြဖို့လည်း တိုက်တွန်းလိုပါတယ်ဗျ။

____________

❏ သင်္ကြန်အကြတ်နေ့နဲ့ အတက်နေ့ (၁၅၊ ၁၆ ဧပြီ ၂၀၂၂)

#CDM_သူရဲကောင်း

#စစ်ဘေးသင့်_စစ်ဘေးရှောင်ပြည်သူ

အကြတ်နဲ့ အတက်နေ့တွေကတော့ CDM သူရဲကောင်းများနဲ့ စစ်ဘေးသင့် စစ်ဘေးရှောင်ပြည်သူများအတွက် ဖြစ်ပါတယ်။

CDM ရဲဘော်များဟာ တော်လှန်ရေးမှာ တခါတလေ မေ့လျော့ခံထားရတဲ့ သူရဲကောင်းတွေ ဖြစ်နေတတ်တယ်ဗျာ။ ပြောရရင် CDM တိုက်ပွဲဟာ နွေဦးတော်လှန်ရေးရဲ့ ပွဲဦးထွက်ခရာမှုတ်သံဖြစ်သလို အရေးပါလှတဲ့ တော်လှန်ရေးမဏ္ဍိုင်ကြီးတရပ် ဖြစ်ပါတယ်။ အခုဆို အကြမ်းဖက်စစ်အုပ်စုရဲ့ ရက်စက်၊ ယုတ်မာစွာ တိုက်ခိုက်ဖျက်ဆီးမှုတွေကြောင့် တနိုင်ငံလုံးမှာ စစ်ဘေးသင့် စစ်ဘေးရှောင်ပြည်သူပေါင်း သိန်းပေါင်းများစွာ ရှိနေပါတယ်။ တောထဲတောင်ထဲ နေထိုင်စားသောက်ရေး အစစဆင်းရဲချို့တဲ့လှတဲ့အပြင် အချို့ဆို ပြန်စရာ ရွာကော အိမ်ပါ မရှိတော့တဲ့ ဘဝ၊ ရွာလုံးကျွတ် မီးရှို့ခံရတဲ့ဘဝတွေပါ။

ဒီနှစ်ရက်မှာတော့ CDM နဲ့ စစ်ဘေးသင့်ပြည်သူတွေကို မဖြစ်မနေ ပံ့ပိုးကူညီကြမယ်ဗျာ၊ အားပေးကြမယ်ဗျာ၊ ဂုဏ်ပြုကြမယ်ဗျာ။ ကိုယ့်အသိတွေထဲမှာ CDM သူရဲကောင်းတွေ၊ စစ်ဘေးသင့်ပြည်သူတွေ အများကြီး ရှိကြမှာပါ။ သူတို့ကို တလေးတစား လေးလေးနက်နက် ဂုဏ်ပြုကြမယ်၊ အားပေးကြမယ်ဗျာ။ ကူနိုင်တာ ရှိရင် ကူကြမယ်ဗျ။ နောက်ဆုံးကုန်ကုန် ပြောမယ်ဗျာ၊ ငွေနဲ့ မကူနိုင်ရင် လေနဲ့ (နှုတ်အားဖြင့်) ဂုဏ်ပြုကျေးဇူးတင်စကား ပြောကြဖို့ကောင်းတယ်ဗျာ။

____________

❏ မြန်မာနှစ်ဆန်းတစ်ရက်နေ့ (၁၇ ဧပြီ ၂၀၂၂)

#သံပုံးတီးသပိတ်

#ဆုတောင်းသပိတ်

#ပန်းသပိတ်

မြန်မာပြက္ခဒိန်အရ နှစ်ဟောင်းကုန်လို့ နှစ်သစ်ရောက်တဲ့ ဒီနေ့မှာတော့ သင်္ကြန်ရိုးရာနဲ့အညီ "သံပုံးတီးသပိတ်" ကို တနိုင်ငံလုံး မြိုင်မြိုင်ဆိုင်ဆိုင် ဆင်နွှဲသွားကြဖို့ပါ။ သံပုံးတီးသံသည် မကောင်းဆိုးဝါးတွေ၊ ဖက်ဆစ်မိစ္ဆာတွေကို မောင်းထုတ်ခြင်း၊ တောထုတ်ခြင်းပါပဲ။

ဒါ့အပြင် မိမိတို့ လူမှုကွန်ရက်စာမျက်နှာတွေမှာ နှစ်သစ်ကူးဆုတောင်းကြတဲ့အနေနဲ့ "ဖက်ဒရယ်ဒီမိုကရေစီ New Year" "အရေးတော်ပုံ အောင်ရမည်" စတဲ့ ကြွေးကြော်တောင်းဆိုသံများနဲ့ ဓာတ်ပုံ၊ ဗီဒီယိုလေးတွေ တင်ကြမယ်ဗျာ၊ သင်္ကြန်ဓလေ့ ပိတောက်ပန်း၊ ငုပန်းအပါအဝင် အခြားအလျဉ်းသင့်ရာ ပန်းများ ပန်ဆင်ကိုင်ဆောင်ကြတဲ့ "ပန်းသပိတ်" နဲ့ "ဆုတောင်းသပိတ်" ကို အတူပူးပေါင်း ဆင်နွှဲကြမယ်ဗျာ။

__________________________

တော်လှန်ရေးကြီးမှာ ရှေ့တန်းကျကျ ပါဝင်ခဲ့ကြတဲ့၊ ပါဝင်နေကြတဲ့၊ ပေးဆပ်ထည့်ဝင်ကြတဲ့ အာဇာနည်ပုဂ္ဂိုလ်များ၊ သူရဲကောင်းများ၊ ရဲဘော်များ၊ ပြည်သူများကို အသိအမှတ်ပြုခြင်း၊ စာနာခြင်း၊ လေးစားခြင်း၊ ဂုဏ်ပြုခြင်း၊ တန်ဖိုးထားခြင်း၊ ထောက်ပံ့ကူညီခြင်း၊ အားပေးခြင်းတို့ကို တော်လှန်သင်္ကြန်ကာလတွေမှာ "လူထုလှုပ်ရှားမှုကြီး" အဖြစ် အုံနဲ့ကျင်းနဲ့ ထိထိရောက်ရောက်၊ ကျယ်ကျယ်ပြန့်ပြန့်၊ လေးလေးနက်နက် ဆောင်ရွက်ကြဖို့ပဲ ဖြစ်ပါတယ်။ ဒါ့အပြင် သင်္ကြန်ဓလေ့နဲ့ လိုက်ဖက်တဲ့ "သပိတ်" တွေလည်း ဆင်နွှဲကြရန် ဖြစ်ပါတယ်။

ယခုနှစ် မြန်မာနှစ်သစ်ကူးသင်္ကြန်ကို တော်လှန်ရေးကာလနဲ့ လိုက်ဖက်ပြီး တော်လှန်ရေးကို အထောက်အပံ့ဖြစ်စေမယ့်၊ သင်္ကြန်ရိုးရာဓလေ့နဲ့ လိုက်ဖက်တဲ့ အထက်ဖော်ပြပါ လူထုလှုပ်ရှားမှုများဖြင့် "တော်လှန်သင်္ကြန်" အဖြစ် လူထုတရပ်လုံးက ပါဝင်ဆင်နွှဲကြဖို့ အထူးနှိုးဆော်တိုက်တွန်းအပ်ပါတယ်ခင်ဗျား။

#တော်လှန်သင်္ကြန်

#ThingyanforRevolution

#အပျော်သင်္ကြန်_ဒို့ငြင်းဆန်_တော်လှန်သင်္ကြန်_ပြည်သူ့အသံ

#ပေတရာပေါ်မှာ_စီးတဲ့သွေးကို_သင်္ကြန်ရေနဲ့_မဆေးကြော

#သွေးအေးသွားရင်_ခွင့်မလွှတ်ကြေး

#အာဏာရှင်စနစ်ဟူသမျှ_မုချကျရှုံးရမည်

#ဖက်ဒရယ်ဒီမိုကရေစီပြည်ထောင်စု_မုချတည်ဆောက်နိုင်ရမည်

#အရေးတော်ပုံ_အောင်ရမည်

Dr. Tayzar San

၉ ဧပြီ ၂၀၂၂