Buuuuu

စစ်ကျွန်မခံ “ဘူး” ငြင်းဆန်အမျိုးသားနေ့ အဓိဋ္ဌာန်

ယခု ကျွန်တော်တို့ ပြည်သူ့တော်လှန်ရေးတိုက်ပွဲကို အောက်ဖော်ပြပါ အဓိကမဏ္ဍိုင် (သို့မဟုတ်) ထောက်တိုင်ကြီး (၅) ရပ်နဲ့ ဗဟိုပြု ဆင်နွှဲနေကြတယ်ဆိုတာ အားလုံး အသိပါပဲ။

၁။ ခုခံတော်လှန်စစ် တိုက်ပွဲ

၂။ သပိတ် တိုက်ပွဲ

၃။ နိုင်ငံ့ဝန်ထမ်းများ၏ CDM တိုက်ပွဲ

၄။ နိုင်ငံတကာ တရားဝင်ရေး (Credential) ကြိုးပမ်းမှု တိုက်ပွဲ‌

၅။ ပြည်သူအားလုံး၏ “ဘူး” သပိတ်တိုက်ပွဲ (Public CDM)

ဒီတော်လှန်ရေး မဏ္ဍိုင်ကြီးတွေအနက် ပြည်တွင်း၊ ပြည်ပ လူထုအားလုံး နေ့စဉ် (၂၄) နာရီ အချိန်ပြည့် ပါဝင်ဆင်နွှဲလို့ ရတာကတော့ လူထု CDM (တစ်နည်း) “ဘူးသပိတ်တိုက်ပွဲ” ပဲ ဖြစ်ပါတယ်။

“ဘူးသပိတ်” ကို မှတ်မိကြပါတယ်နော်။ အကြမ်းဖက် အာဏာသိမ်းစစ်ကောင်စီကို အသိအမှတ် မပြုဘူး။ အပတ်အသက် မလုပ်ဘူး။ စစ်တပ်ပိုင်တဲ့ သို့မဟုတ် စစ်တပ်နဲ့ဆိုင်တဲ့ ကုန်စည်နဲ့ ဝန်ဆောင်မှုတွေကို မဝယ်ယူဘူး၊ အားမပေးဘူး။ အခွန် မဆောင်ဘူး။ ဧည့်စာရင်း မတိုင်ဘူး။ စစ်ကောင်စီရဲ့ မတရားတဲ့ အမိန့်အာဏာ၊ အုပ်ချုပ်ရေးယန္တရားတွေကို လက်မခံဘူး။ စစ်ကောင်စီနဲ့ (နိုင်ငံရေး၊ စီးပွားရေး၊ လူမှုရေး ကဏ္ဍအစုံ) ပူးပေါင်းဆောင်ရွက်တာမျိုး လုံးဝမလုပ်ဘူးစတဲ့ အထွေထွေ “ဘူး” ငြင်းဆန်ရေး လှုပ်ရှားမှုကြီး ဖြစ်ပါတယ်။ အချုပ်ပြောရရင်တော့ ပြည်သူလူထုတစ်ရပ်လုံးက အကြမ်းဖက်စစ်ကောင်စီကို လူထု CDM (Public CDM) လုပ်ကြဖို့ပါပဲ။ ကျွန်တော်တို့ဆီမှာ CDM လို့ ပြောလိုက်ရင် နိုင်ငံ့ဝန်ထမ်းတွေနဲ့ပဲ သက်ဆိုင်သလို နားလည်နေကြပေမယ့် တကယ်တော့ ပြည်သူလူထုတစ်ရပ်လုံးက အကြမ်းဖက်စစ်ကောင်စီကို တညီတညွတ်တည်း လူထု CDM လုပ်ကြဖို့ အထူးအရေးကြီးပါတယ်။

ဒီ ပြည်တွင်းပြည်ပ တစ်ကမ္ဘာလုံးက ပါဝင်နိုင်တဲ့ “ဘူးသပိတ်” ကြီးဟာ စစ်ကောင်စီရဲ့ အသက်သွေးကြောတွေ၊ အရင်းအမြစ်တွေအားလုံးကို ရိုက်လှဲဖြိုချပစ်ပြီး အသက်မဲ့သွားစေမှာပဲ ဖြစ်ပါတယ်။ တိုက်တိုက်ဆိုင်ဆိုင်ဆိုသလို ယခုလာမယ့် တန်ဆောင်မုန်းလပြည့်ကျော် (၁၀) ရက်နေ့ (၂၈ နိုဝင်ဘာ၊ ၂၀၂၁) ဟာ အမျိုးသားအောင်ပွဲနေ့ (၁၀၁) နှစ် ပြည့်မြောက်မယ့် နှစ်ပတ်လည် အခါသမယလည်း ဖြစ်ပါတယ်။ ခရစ်နှစ် (၁၉၂၀) မှာ ပေါ်ပေါက်ခဲ့တဲ့ ပထမ ကျောင်းသားသပိတ်နဲ့ အမျိုးသား‌ပညာရေးလှုပ်ရှားမှုကြီးဟာ မြန်မာပြည်သူအများကို နိုင်ငံရေးအသိနဲ့ နိုးကြားမှု အုံနဲ့ကျင်းနဲ့ တိုးတက်စေခဲ့သလို နယ်ချဲ့စနစ်အောက်က လွတ်မြောက်ရေးအတွက် လမ်းစလည်း ဖြစ်ခဲ့ပါတယ်။ နောက်ပြီး အမျိုးသားနေ့ လှုပ်ရှားမှုရဲ့ ဝိသေသထူးတစ်ခုက ဗြိတိသျှ ကိုလိုနီနယ်ချဲ့ရဲ့ ကျွန်ပညာရေးကို သပိတ်မှောက်၊ “ဘူး” ငြင်းဆန် (Public CDM) လုပ်တဲ့အပြင် ကိုယ်ပိုင်အမျိုးသားပညာရေးကို ဖော်ဆောင်ခဲ့ကြတာ ဖြစ်ပါတယ်။ အဓမ္မအုပ်စိုးသူ လူတန်းစားရဲ့ အုပ်ချုပ်ရေးယန္တရားကို CDM လုပ်၊ သပိတ်မှောက်တယ်။ တပြိုင်နက်မှာပဲ အဲ့ဒီကုန်စည် သို့မဟုတ် ဝန်ဆောင်မှုဟာ မိမိတို့အတွက် လိုအပ်နေပါက ရွေးချယ်ရာ နည်းလမ်း၊ အဖြေတစ်ခုကို မိမိတို့ကိုယ်‌တိုင် တည်ဆောက်လိုက်ခြင်းလည်း ဖြစ်ပါတယ်။ ဒါ့ကြောင့် (၁၉၂၀) ပြည့်နှစ်တုန်းက ကိုလိုနီကျွန်ပညာရေးကို “ဘူး” ငြင်းဆန်ခဲ့တဲ့ အမျိုးသားအောင်ပွဲနေ့ အဓိဋ္ဌာန်ကို ထုံကူးရယူကာ ယခု (၂၀၂၁)၊ နွေဦးတော်လှန်ရေးမှာလည်း ပြည်သူလူထုတစ်ရပ်လုံးက အထွေထွေ “ဘူးသပိတ်” တိုက်ပွဲကို တညီတညွတ်တည်း အရှိန်မြှင့် ဆင်နွှဲကြပါစို့လို့ နှိုးဆော်တိုက်တွန်းအပ်ပါသည်ခင်ဗျား။

❝စစ်ကျွန်မခံ “ဘူး” ငြင်းဆန်အမျိုးသားနေ့ အဓိဋ္ဌာန်❞

#အားလုံးဆင်နွှဲ_ဘူးသပိတ်တိုက်ပွဲ

#လူထုCDM_ဘူးသပိတ်နဲ့_တော်လှန်

စစ်အာဏာရှင်စနစ် မုချကျရှုံးရမည်။ “ဘူး” တစ်လုံးဆောင်၍ အရေးတော်ပုံ အောင်ရမည်။

ဒေါက်တာ တေဇာဆန်း

၁၇ နိုဝင်ဘာ ၂၀၂၁